Zvicra ndërpret lidhjet hekurudhore me Italinë

Arsyeja e pezullimit qëndron në rregullat e ashpërsuara kundër koronavirusit në Itali

Nga e enjtja, 10 dhjetor, Ndërmarrja Federale e Hekurudhave të Zvicrës SBB dhe ajo e Italisë, Trenitalia, do të ndalojnë trafikun kufitar hekurudhor me Zvicrën për një periudhë të pacaktuar, shkruan sda.ch.

Arsyeja e pezullimit të trafikut hekurudhor ndërkufitar qëndron në rregullat e ashpërsuara për luftimin e koronavirusit në Itali, transmeton albinfo.ch.

Vendimi bazohet në një dekret të qeverisë italiane, ka njoftuar SBB të martën. Ndër të tjera, ky dekret kërkon matjen e temperaturës së udhëtarëve në trena, thonë në SBB.

Kompania hekurudhore zvicerane nuk mund t’i plotësonte këto kërkesa, përcjell albinfo.ch. Kjo është arsyeja pse ajo ka vendosur të ndërpresë ofertën e trenave EuroCity midis Zvicrës dhe Italisë nga e enjtja për një periudhë të pacaktuar.

Përveç lidhjeve në distanca të gjata, nga ky vendim preken edhe shërbimet hekurudhore rajonale ndërkufitare si  “Tilo”.

Por trenat në trafikun rajonal midis Brig-ut zviceran dhe Domodossolës italiane nuk preken nga vendimi i përmendur.

---