Zvicra merr masa kundër trafikimit me qenie njerëzore

Zvicra ka vendosur të shtojë masat kundër trafikimit me qenie njerëzore, gjegjësisht me refugjatë. Në kuadrin e këtyre masave, autoritetet përgjegjëse do të formojnë një grup pune. Këtë deklaratë e ka dhënë sot zëvendësdrejtori i Policisë Federale të Zvicrës (Fedpol) Olivier Pecorini për radion zvicerane SRF.

Ky grup pune përbëhet nga punonjës të trupave të mbrojtjes kufitare, nga policitë kantonale, policia federale dhe autoritetet e drejtësisë. Në grupin e përmendur bëjnë pjesë edhe policë italianë dhe gjermanë.

Qëllimi i krijimit te grupit është zbulimi i trafikantëve, kapja e tyre dhe dënimi, ka thënë Pecorini. Dhe për të gjitha këto nevojitet bashkëpunim me vendet fqinje, ka shtuar ai.

Krijimi i grupit të punës vjen si reaksion ndaj tragjedisë së rëndë të refugjatëve që ka ndodhur të enjten në Austri me ç`rast janë gjetur trupat e pajetë të 71 refugjatëve.