Zvicra, me kapacitete të kufizuara për refugjatët

Maksimumi i vendeve për strehim është 1800. Më shumë se kaq, do të strehoheshin në bunkerët e mbrojtjes civile

Kapacitetet strehuese të Zvicrës do të gjendeshin në një situatë të “emergjencës absolute” në rast se nga Libia do të vinte një numër shumë i madh refugjatësh, siç po vlerësohet se mund të ndodhë.

Këtë frikë e ka shprehur zëvendësdrejtoresha e Entit Federal për Migracion Eveline Gugger Bruckdorfer, në gazetën “Sonntag”. E papërballueshme për Zvicrën, sipas saj, do të ishte nëse “befasisht do të fillonin të vinin nga 5000 refugjatë në muaj.

Numri maksimal i refugjatëve për të cilin aktualisht mund të sigurohet strehim është 1800, ka thënë ajo. Pjesa tjetër, eventuale, mund të strehohej mbase në hapësirat e mbrojtjes civile (kryesisht bunkerë).

Ndërkasq, ministrja e drejtësisë, SImonetta Sommaruga në një intervistë për radion drs ka thënë se Federata është duke kërkuar një zgjidhje por në rastin ekstrem duhet që edhe kantonet të zgjerojnë strukturat e tyre pranuese. “Megjithatë, ne do të bëjmë gjithçka në mënyrë që të mos i shpërndajmë refugjatët nëpër kantone”, ka theksuar ajo.