Zvicra, marrëveshje për migracionin me Kongon

Marrëveshja e nënshkruar mga ministrja Sommaruga siguron mbështetjen e kthimit vullnetar të azilkërkuesve kongolezë nga Zvicra

Ministrja e drejtësisë, Simonetta Sommaruga, gjatë vizitës së saj në disa shtete të Afrikës është ndalur edhe në Republikën Demokratike të Kongos. Me këtë rast ajo ka nënshkruar me qeverinë e atjeshme në Kinshasa një marrëveshje për migracionin.

Kjo marrëveshje, të cilën për Kongon e ka nënshkruar  ministri i brendshëm i vendit, Richard Muey Mangez, siguron mbështetjen e kthimit vullnetar të azilkërkuesve kongolezë nga Zvicra. Nga ana tjetër Kinshasa zyrtare obligohet të bëjë pranimin e qytetarëve të vet të cilët nuk kanë të drejtë qëndrimi në Zvicër. 

Sommaruga ka vizituar edhe qendrën e financuar nga Zvicra “Maison des Congolais e l`etranger et des migrants” në Kinshasa. Punë e kësaj qendre këshillimore është që të sqarojë popullatën vendore lidhur me rreziqet e emigrimit ilegal.

Sipas Departamentit të jashtëm të Zvicrës, në Kinshasa po zhvillohet me sukses një projekt i cili u hap perspektiva të reja grave kongoleze duke u ofruar mikrokredi.

Pas Nigerisë dhe Kongos, ministrja Sommaruga do të vizitojë ehde Angolën, ku do të lidhë po ashtu edhe një marrëveshje për migracionin