Zvicra, e rëndësishme për paqen në Kosovë

Helikopterët dhe inxhinierët e ushtrisë zvicerane janë shumë të rëndësishëm për sigurinë në Kosovë, deklaroi komandanti i KFOR-it Francesco Paolo Figliuolo

Komandanti i paqeruajtësve ndërkombëtarë të KFOR-it, gjeneralmajor Francesco Paolo Figliuolo, ka falënderuar Qeverinë e Zvicrës për kontributin e lartë që po jep kontingjenti i Zvicrës në kuadër të KFOR-it në Kosovë, në aspektin e aftësive të vlefshme operacionale dhe personelit të specializuar dhe professional.

Gjenerali Figliuolo theksoi rolin e rëndësishëm të aseteve zvicerane të helikopterëve dhe inxhinierëve si dhe Detashmentit të Përbashkët Rajonal-Veri (DPR-V), i cili vepron në pjesën veriore të Kosovës me asete jo-kinetike, duke kontribur në ndërgjegjësimin e KFOR-it për situatën në terren.

Këtë vlerim gjenerali italian e dha pas një takimi që zhvilloi me ambasadoren e Zvicrës në Kosovë, Krystyna Marty Lang, e cila vizitoi Shtabin e Përgjithshëm të KFOR-it NATO-s në Prishtinë.

Ambasadorja Lang ka konfirmuar mbështetjen e Zvicrës ndaj KFOR-it.

Përveç kësaj, ajo theksoi se qeveria zvicerane është aktive në Kosovë në fushën e shëndetësisë, infrastrukturës dhe integrimit të pakicave. Ndërsa në veçanti, ambasadorja theksoi se Zvicra merr në konsideratë çështjet sociale të emigrantëve kosovarë.

Në fund, ata ranë dakord mbi rëndësinë e një qasje gjithëpërfshirëse që përfshin përfaqësuesit e komunitetit ndërkombëtar për të arritur normalizimin e shoqërisë nëpërmjet dialogut dhe bashkëpunimit në rajonin e Ballkanit.

Që nga tetori i vitit 1999, forcat e armatosura zvicerane kanë qenë të përfshira

në misionin e KFOR-it. Aktualisht, janë rreth 200 pjesëtarë të shërbimit zviceran të vendosur në KFOR, kryesisht në Kampin ‘Film City’, në Kampin në Prizren dhe Kampin Marechal de Lattre de Tassigny në Vushtrri.