Zvicra do të dhurojë mbi 300 milionë franga në luftën globale të Covid-19

Zvicra do të sigurojë mbi 300 milionë franga për të ndihmuar në rritjen e aksesit në vaksina, teste dhe trajtime në luftën kundër Covid-19 dhe për të siguruar që vendet në zhvillim të marrin pjesën e tyre të drejtë

Qeveria Zvicerane shprehu angazhimin e saj “për të siguruar qasje të barabartë në vaksina, teste dhe ilaçe në të gjithë botën në mënyrë që të luftojë pandeminë Covid-19 në mënyrë të qëndrueshme”.

Në një deklaratë, kantoni Bern tha se kishte në plan të dhuronte rreth 300 milionë franga zvicerane (328 milionë dollarë, 272 milionë euro), shkruan The Local, përcjell albifo.ch.

Programi global me shumë miliardë dollarë kordinohet nga një sërë organesh ndërkombëtare duke përfshirë Organizatën Botërore të Shëndetësisë, aleancën e vaksinave Gavi dhe Bankën Botërore.

Ai synon të ndihmojë zhvillimin dhe sigurimin e aksesit në vaksina, ilaçe dhe teste kundër Covid-19 dhe forcimin e sistemeve të kujdesit shëndetësor.

“Ndërsa përparim i madh është bërë në zhvillimin e testeve, trajtimeve dhe vaksinave, mungon një qasje e gjerë dhe e barabartë në të gjithë botën”, njoftoi kantoni i Bernit, duke shprehur shqetësim të thellë rreth “mutacioneve në shfaqje, shumë ngjitëse të virusit”, të cilat po komplikojnë luftën pandemike.

“Një fund i shpejtë dhe efikas i pandemisë është shumë në interes të Zvicrës”, thuhet në njoftim, duke theksuar se “virusi mund të përmbahet me sukses vetëm pasi përhapja e tij të frenohet në të gjithë botën”.

Qeveria Zvicerane tha se qëllimi i saj kryesor me mbështetjen e ACT-A ishte të ndihmonte vendet në zhvillim.

Ai tha se më shumë se një e treta e 300 milionë frangave të destinuara për ACT-A do të shkonin në Gavi, e cila punon për të përmirësuar aksesin ndaj vaksinave në vendet e varfëra, ndërsa disa fonde do të shkonin drejt rritjes së kërkimit dhe zhvillimit dhe qasjes në testet Covid-19 dhe ilaçet.

Fondet e mbetura, do të përdoren për të forcuar sistemet lokale të kujdesit shëndetësor në vendet në zhvillim. Parlamenti zviceran do të diskutojë kredinë shtesë të kërkuar gjatë sesionit të tij veror, tha Bern.

---