Zvicër: Reshje të dendura bore rikthejnë dimrin, deri në një metër borë të re deri të martën

(KEYSTONE/Michael Buholzer)

Reshjet e dendura të borës pritet të rikthejnë dimrin në Zvicër, me deri në një metër borë të re që mund të bjerë deri të martën në mbrëmje. Reshjet do të shoqërohen me erëra të forta dhe stuhi në disa rajone.

Sipas MeteoSwiss, zonat më të prekura do të jenë rajoni i Glarusit, nga Alpet e Urit deri në pjesën perëndimore të Oberlandit Bernes, si dhe në lindje drejt vargmalit të Rätikonit. Mbi 1500 metra lartësi pritet të bien nga 70 deri në 100 centimetra borë e re. Deri të martën në mbrëmje, kufiri i borës parashikohet të zbresë në rreth 600 metra mbi nivelin e detit, transmeton albinfo.ch.

Erëra të forta në të gjithë rajonin

Erëra të fuqishme nga perëndimi dhe veriperëndimi do të përfshijnë zonat e prekura. Mbi 2000 metra lartësi, parashikohen shpërthime ere që mund të arrijnë deri në 120 kilometra në orë. Edhe zonat fushore do të përballen me erëra të forta, me shpejtësi deri në 90 km/h.

Shkaku meteorologjik

Sipas ekspertëve, reshjet intensive janë pasojë e një qarkullimi rrotullues të masave ajrore nga perëndimi-veriperëndimi mbi Alpe. Ky sistem ndodhet midis një zone me presion të lartë atmosferik në brigjet atlantike të Portugalisë dhe një zone me presion të ulët mbi Detin e Veriut. Si rezultat, ajri i lagësht tërhiqet herë pas here mbi territorin zviceran, ku grumbullohet dhe shkakton reshje të dendura bore.