Zvicër: Hidhet në erë një antenë e telefonisë mobile

Policia nuk jep informacione nëse bëhet fjalë për ndonjë antenë 5G të vendosur rishtas

Një shpërthim i fuqishëm që ka ndodhur në orët e hershme të mëngjesit të së dielës në Denens të Kantonit Vaud ka shkatërruar një antenë të telefonisë mobile që shfrytëzohej nga kompanitë Swisscom dhe Salt.

Policia e Kantonit të Vaudit dyshon se fjala është për një akt kriminal, shkruan srf.ch. Nga shpërthimi dhe nga zjarri i shkaktuar, janë dëmtuar telat dhe një pjesë e shtyllës ku ishte e vendosur antena. Ndërsa lokali që i takonte kësaj antene është shkatërruar plotësisht nga pasojat e shpërthimit, bën të ditur policia.

Njësitet zjarrfikëse kanë arritur ta fikin zjarrin ndërsa nuk ka asnjë të lënduar nga ky shpërthim.

Policia nuk jep informacione nëse bëhet fjalë për ndonjë antenë 5G të vendosur rishtas. Instalimi i antenave të këtij lloji, ka ngjallur reagime të ashpra nga ambientalistët dhe një pjesë  e shoqërisë civile në Zvicër, shkruan albinfo.ch

Prokuroria kompetente publike ka iniciuar hetimet rreth ngjarjes.

---