Zhduken disa kilogramë mjete shpërtheyese në një shkollë rekrutimi

Me rastin e kontrollimit që u është bërë arkave me municion në një shkollë rekrutësh të këmbësorisë është konstatuar mungesa e disa kilogramëve të materies shpërthyese

Ushtria ka bërë të ditur se në një shkollë rekrutësh është paraqitur zhdukja e një sasie mjetesh shpërthyese. Me rastin e kontrollimit që u është bërë arkave me municion  në një shkollë rekrutësh të këmbësorisë është konstatuar mungesa e disa kilogramëve të materies shpërthyese, shkruan srf.ch.

Këtë njoftim e ka bërë sot Departamenti Federal i Mbrojtjes, transmeton albinfo.ch. Departamenti në fjalë ndërkaq nuk e ka saktësuar nëse bëhet fjalë për dinamit, fitila ndezës ose tela për aktivizimin e materies shpërthyese nga larg.

Zëdhënësi i ushtrisë nuk ka mundur të japë më shumë hollësi. Ai ka shtuar vetëm se mund të jetë fjala për vjedhje ose për ngarkesa me defekte.

Duke qenë se bëhet fjalë për një problem serioz, autoritetet e ndjekjes në kuadrin e ushtrisë kanë iniciuar një proces hetimi.