Zbulohet një shpellë në Kaçanik (foto)

Shpella është zbuluar rastësisht gjatë punimeve në autostradën Prishtinë-Shkup, në mes të fshatit Semajë dhe Izhacë nga kompania “Bechtel Enka”

Organizata për mbrojtjen e mjedisit “Gjethi” ka njoftuar se, gjatë punimeve në autostradën Prishtinë-Shkup, në mes të fshatit Semajë dhe Izhacë kompania “Bechtel Enka”, hasi në një shpellë, raporton televizioni publik i Kosovës.

Kjo organizatë ka njoftuar se ka gjetur një shpellë, derisa detaje tjera nuk janë bërë të ditura, përcjell albinfo.ch.

“OMMGJ kërkon me urgjencë që punimet të ndërpriten deri në sqarimin e situatës dhe marrjes së mendimit nga profesionistët e kësaj lëmie. Ne konsiderojmë se kjo shpellë mund të ketë rëndësi potenciale në shumë sfera si dhe mund të ndikojë në zhvillimin e turizmit në këtë rajon andaj kërkojmë që të punohet me profesionalizëm. Ne si shoqëri civile jemi dukë shikuar me vigjilencë zhvillimin e kësaj situate dhe kërkojmë që të veprohet menjëherë”, thuhet në njoftimin e Organizatës për mbrojtjen e mjedisit “Gjethi”.

Ende nuk dihet se sa e vjetër është kjo shpellë.