Zari Xhaferi, pjesë e ekzekutivit në qytetin e Baarit

Kjo është hera e parë që një shqiptar arrin sukses në këtë nivel në Zvicër

Politikani shqiptar, Zari Xhaferi (Dzaferi), anëtar i Partisë Socialdemokrate është zgjedhur pjesë e ekzekutivit në Qeverinë e qytetit Baar, ku ai jeton, njofton albinfo.ch.

Kjo është hera e parë për një shqiptar, që arrin sukses në këtë nivel. Ai arriti një sukses mjaft të madh në zgjedhjet që janë zhvilluar sot.

Xhaferi është nënkryetar i SP-së së Kantonit Zug dhe kryetar i SP-së për qytetin Baar, shkruan albinfo.ch.

Ai ka qenë kandidat në zgjedhjet për Parlamentin Nacional të Zvicrës.

Albinfo.ch ka ndjekur rrugën e ngritjes politike të Zariut që nga fillimi. Në një intervistë të realizuar pas zgjedhjes së tij deputet kantoni, disa vjet më parë, ai kishte treguar ambicie edhe për politikën në rrafshin ekzekutiv, por duke e  vendosur atë “në një të ardhme”.

Xhaferi, i cili punon si mësimdhënës dhe gazetar, është shumë aktiv në jetën shoqërore dhe politike të kantonit të tij dhe më gjerë.

---