Youtube gjobitet me 170 milionë dollarë

Kompania Google dhe shërbimi i saj për video YouTube do të paguajnë 170 milionë dollarë gjobë, për “t’i dhënë fund” akuzës për shkelje ligji duke mbledhur informacione private për fëmijët, tha sot Komisioni Federal i Tregtisë i SHBA (FTC).

YouTube, sipas aktakuzës, ka monitoruar shikuesit e kanaleve të fëmijëve përmes të ashtuquajturave cookie, pa pëlqimin e prindërve, dhe më pas ka përdorur ato për të ofruar reklama të synuara për ata shikues.

Marrëveshja mes FTC dhe Zyrës e Prokurorit të Përgjithshëm në Nju-Jork, e cila do të marrë 34 milionë dollarë, është më e madhja qëkur ligji që ndalon mbledhjen e informacionit për fëmijët nën 13 vjeç hyri në fuqi më 1998, transmeton KosovaPress, përcjell albinfo.ch.

Ligji u rishikua në 2013-ën për të “mbuluar cookie”, të cilat përdoren për të ndjekur zakonet e shfletimit në internet.

---