“Xhihadistët duhet të gjykohen në vendin e origjinës”

Ndërsa Këshilli Federal ka vendosur të mos riatdhesojë xhihadistët me shtetësinë zvicerane, ambasadori i SHBA në Zvicër nuk është dakord, duke argumentuar se këta njerëz duhet të gjykohen në vendet e tyre të origjinës, përcjell albinfo.ch.

Ed McMullen tha se nuk donte të ndërhynte në çështjet zvicerane, por tha se Zvicra duhet të ndjekë drejtimin e Shteteve të Bashkuara dhe të riatdhesojë qytetarët e vet, të cilët janë anëtarë të grupeve terroriste të kapura në rajonin Irak-Siri nga forcat kurde.

“Do të riatdhesojmë qytetarët tanë dhe do t’i ndjekim ata. Ne shpresojmë që shumica e vendeve të tjera do të bëjnë të njëjtën gjë, “i tha ai të hënën radios publike zvicerane, RTS. “Kushdo që lufton me Shtetin Islamik do të riatdhesohet dhe duhet të akuzohet me të gjitha mjetet e mundshme ligjore. Dhe vendi i origjinës është vendi më i përshtatshëm për të gjykuar krimet e tyre “.

Presidenti i SHBA, Donald Trump njoftoi në dhjetor se po tërhiqte trupa nga Siria dhe i ka bërë thirrje rregullisht vendeve evropiane për të marrë qytetarët e tyre, përcjell albinfo.ch.

Muajin e kaluar, qeveria zvicerane hodhi poshtë thirrjet për të riatdhesuar në mënyrë aktive militantët islamikë me shtetësi zvicerane nga Siria apo Iraku. Qytetarët zviceranë nuk do të pengoheshin të ktheheshin në vend, tha qeveria, por autoritetet kërkonin që xhihadistët të gjykoheshin sipas standardeve ligjore ndërkombëtare në vendin ku kryenin krimet e tyre.

Aktualisht janë rreth 20 xhihadistë të dyshuar – burra, gra dhe të mitur me pasaporta zvicerane, disa prej të cilëve janë në paraburgim në Siri dhe Irak, përcjell albinfo.ch.

Shifrat më të fundit nga Shërbimi Informativ Federal tregojnë se 93 xhihadistë janë larguar nga Zvicra për zonat e konfliktit që nga viti 2001, nga të cilët 78 kanë shkuar në Siri dhe Irak. Prej tyre, 27 janë konfirmuar të vrarë dhe 16 janë kthyer në Zvicër.