Widmer-Schlumpf vendos të rikandidojë

Sondazhet e bëra, kanë konstatuar se Schlumpf gëzon besimin e shumicës së popullatës për të mbetur në qeveri

Anëtarja e Qeverisë Federale, ministrja aktuale e financave, Eveline Widmer-Schlumpf ka vendosur të kandidojë sërish për vendin në qeveri. Këtë vendim e ka marrë “pas analizave të hollësishme të bëra me partinë e saj BDP dhe me familjen”, ka thënë kryetari i BDP-së Hans Grunder për gazetën “Sonntagszeitung”.

Sipas tij, Widmer-Schlumpf është e bindur se vazhdimi i qëndirmit të saj në qeveri do t`i kontribuojë stabilitetit të qeverisë. Rikandidimi i ministres së financave është vënë në pyetje pasi që partia SVP-UDC, të cilës më parë i takonte znj. Schlumpf, bazuar në përqindjen e votave, ka shfaqur pretendime për vendin e dytë në Këshillin e ministrave.

Me këtë rast, sipas përllogaritjeve të opartisë në fjalë, ministrja nga partia më e vogël, Widmer-Schlumpf, do të duhej “të lëshonte udhë”.

Nga ana tjetër, sondazhet e bëra nga gazeta dhe medie të tjera të ndryshme kanë konstatuar se Schlumpf gëzon besimin e shumicës së popullatës për të mbetur në qeveri. Po kështu, brenda qeverisë (Këshillit Federal) ajo favorizohet nga shumica dërmuese e kolegëve, më shumë se një anëtar i ri eventual nga SVP-UDC.