Vuçiq: Edhe po erdhën 350 milionë amerikanë, Serbia s’e njeh Kosovën

(KEYSTONE/Laurent Gillieron)

Shtyrja e takimit në Paris nuk është disfatë e Gjermanisë dhe e Francës, por është situatë e vështirë për të gjithë, sepse shqiptarët e Kosovës e dinë se Serbia tash i ka kohët e veta më të mira dhe dëshiron të përparojë edhe më shumë, për ç’gjë është i nevojshëm stabiliteti politik dhe ata duan ta shfrytëzojnë këtë, ka deklaruar presidenti serb, Aleksandër Vuçiqi.

Ai ka shtuar se nuk është i lumtur që takimi i Parisit u shty.

“Serbia tash ka të drejtë ta bëjë hapin e vet”, ka thënë Vuçiq, transmeton Koha.net.

I pyetur nëse shtyrja e takimit në Paris është sinjal se SHBA-ja duhet të përfshihet në dialogun Serbi –Kosovë për zgjidhjen problemit, gjë që është edhe qëndrim i profesorit amerikan Edward Joseph, Vuçiq ka thënë se “Joseph është serioz, i cili kurrë nuk ka qenë afër qëndrimeve të Beogradit, porse për Serbinë është e pamundur që të gjithë ata që e duan rolin kryesor të jenë përkrahësit e pavarësisë së Kosovës”.

“Shqiptarët e Kosovës po flasin gjepura, ndërsa Haradinaj e ka filluar ndjekjen kundër serbëve për shkak se për Serbinë po vijnë ditë më të mira”, ka thënë Vuçiq, njofton b92.

“Përgjigjja jonë është se neve po na ngutet, sepse po përparojmë shpejt, ndërsa kjo nuk do të thotë se Serbia mund të përulet e t’i asgjësojë interesat e veta kombëtare”, ka thënë tutje ai, duke shtuar se shqiptarët e Kosovës po shpresojnë në mrekulli, në politikë mrekullitë nuk ndodhin.

Serbisë i mbetet ta kërkojë zgjidhjen me kompromis, ndërsa për sa i përket njohjes së Kosovës- edhe po t’i sjellin 350 milionë amerikanë, ajo nuk mund të zgjidhet në atë mënyrë, është kërcënuar Vuçiqi.

Ai mendon se amerikanët e dinë këtë, prandaj e dëshirojnë dialogun, shkruan kohanet, përcjell Albinfo.ch.

“Shpresoj se në ndërkohë do t’i evitojmë tensionet”, ka përfunduar Vuçiq.