Vritet me thikë një 15-vjeçar në Prizren

Sipas raportit të Policisë së Kosovës, një i ri ka mbetur i vdekur si pasojë e një përleshjeje që ka ndodhur mëngjesin e sotëm ndërmjet pesë personave në Prizren, përcjell albinfo.ch.

Nga një përleshje fizike që ka shkuar deri te përdorimi i armëve të ftohta, si pasojë, një i ri ka mbetur i vdekur.

Policia e Prizrenit ka thënë se viktima L.B. është 15-vjeçar, ndërkaq edhe i dyshuari është i po të njëjtës moshë.

Në stacionin policor në Prizren janë duke u intervistuar i dyshuari dhe dëshmitarët që kanë qenë në vendngjarje në momentin kritik.

“Pas një përleshjeje ndërmjet pesë personave të mitur, njëri nga të miturit i dyshuar ka goditur viktimën L.B. me mjet të mprehtë, përkatësisht thikë, duke i shkaktuar lëndime serioze, për pasojë viktima ka ndërruar jetë”, thuhet në njoftimin e Policisë.

Po ashtu, është bërë e ditur se përveç Policisë, në vendin e ngjarjes kanë dalë edhe prokurori i shtetit dhe ekspertët.

Me urdhër të prokurorit, viktima është dërguar në Institutin e Mjekësisë Ligjore në Prishtinë për autopsi.