Vrasja e dyfishtë në Bazel, të hënën fillon gjykimi ndaj njërit sulmues

Për veprën penale “vrasje të shumëfishtë”, para Gjykatës penale të Bazelit, nga e hëna do të duhet të paraqitet një shqiptar 42-vjeçar. Ai ishte arrestuar pas të shtënave me armë që ndodhën në një kafene në Bazel, në mars të vitit 2017.

Dy sulmues kishin hyrë në një kafene të lagjes, jo shumë larg teatrit muzikor, mbrëmjen e së enjtes pas orës tetë, shkruajnë mediat zvicerane, përcjell Albinfo.ch. Njëri nga ta ka shtënë katër herë qëllimshëm në drejtim të disa mysafirëve. Pastaj ata janë larguar menjëherë nga vendngjarja. Rreth një muaj më vonë, prokurorët kanë qenë në gjendje të identifikojnë dhe të arrestojnë një të dyshuar.

Gjatë të shtënave janë vrarë dy shqiptarë të moshës 28 ​​dhe 39 vjeçare, ndërsa ishte plagosur rëndë një shqiptar 24-vjeçar. Të gjitha viktimat nuk kanë pasur nënshtetësi zvicerane dhe jashtë vendit ishin denoncuar disa herë.

Si motiv i vrasjeve dyshohet të jetë lufta e grupeve për pushtet e trafikantëve të lëndëve narkotikem, informon Albinfo.ch. Deri më tani, i dyshuari i dytë ende gjendet në arrati.