Vonohet fluturimi, acarohen pasagjerët në Aeroportin e Prishtinës

Vonesa e fluturimeve tollovia e madhe që është parë sot në Aeroportin Ndërkombëtar “Adem Jashari”, ka shkaktuar acarime në mes pasagjerëve dhe agjencioneve për fluturime.

Frekuentimi masiv në aeroportin e Prishtinës në këtë kohë ndodh edhe për shkak të sezonit festiv, kohë kur bashkatdhetarët nga diaspora vizitojnë Kosovën gjatë festës së Vitit të Ri.

Reporteri i KosovaPress-it, i cili ka qenë në vendin e ngjarjes, thotë se shumë pasagjerë janë ankuar se janë detyruar të paguajnë bileta për të dytën për t’u kthyer në vendet tyre. Në mesin e pasagjerëve ka edhe shtetas zviceranë.

E kontaktuar nga KosovaPress, zëdhënësja e Aeroportit Ndërkombëtar “Adem Jashari”, Valentina Gara, tha se vonesa në fluturime ka vetëm në një linjë fluturimi.

“Është vonesë normale, në ora 17:40 është dashur të niset, ndërsa fluturimi po realizohet në ora 19:40. Vonesa prej dy orëve është shkaktuar nga kompania përkatëse ajrore”, tha ajo.

Gara tha se fluturimet tjera po realizohen në orarin e paraparë pasi nuk ka mjegull sikur ditëve të kaluara.

Në një video që ka siguruar KosovaPress, shihet se si disa pasagjerë të tensionuar nga pritjet e gjata fjalosen me një nga zyrtarët e një agjencioni të fluturimeve.

Acarimi mes tyre vjen pasi pasagjerët detyrohen të paguajnë biletën e fluturimit për të dytën herë.