VMRO: kurrë nuk e pranojmë dygjuhësinë

“Nuk duam të pranojmë asnjë ide rreth dygjuhësisë, për ridefinim të Maqedonisë, asnjë kalkulim me emrin kushtetues”, tha Ilija Dimovski, anëtari i Komitetit të VMRO-DPMNE-së

Derisa partia më e madhe e opozitës maqedonase, Lidhja Social Demokratike (LSDM) ka premtuar se me fitoren e kësaj partie në zgjedhjet e 11 dhjetorit, gjuha shqipe do të jetë gjuhë zyrtare në Maqedoni, partia tjetër që ka qenë në pushtet dhe që është dëshmuar për krim dhe korrupsion, VMRO DPMNE thotë e dygjuhësia nuk do të vij as në shprehje.

Anëtari i Komitetit të VMRO-DPMNE-së, Ilija Dimovski tha në Kuçani se këto zgjedhje do të jenë zgjedhje në të cilat do të luftojmë për të ruajtur Republikën e Maqedonisë, “ashtu siç na e kanë lënë brezat tanë që luftuan dhe vdiqën për të”.

“Rendi kushtetues i Republikës së Maqedonisë, është ashtu siç është shumica e maqedonasve. Duam të dërgojmë mesazh të qartë, se nuk duam të pranojmë asnjë ide rreth dygjuhësisë, për ridefinim të Maqedonisë, asnjë kalkulim me emrin kushtetues të Republikës dhe të identitetit kombëtar, me gjuhën dhe me atë që jemi, maqedonas”, tha Dimovski, citon TV shenja.

Së bashku me anëtarët e tjerë të partisë, ai ka pasur takime me qytetarët dhe anëtarët e VMRO-DPMNE-së në njësinë e tretë zgjedhore.