Vlerësohet prezantimi i veprave të të rinjve nga Kosova në Evropë

Ekspozita e nxënësve me titull “New Urbanistic and Culture of Cohabitation in Kosovo“ ka arritur një sukses të madh në Bienalen e Venecias, Kjo ekspozitë është e mbështetur nga Ministria e Mjedisit dhe Planifikimit Hapësinor, Ministria e Punëve të Jashtme e Republikës së Kosovës, Ministria e Kulturës, Rinisë dhe Sportit etj.

Pikturat e nxënësve nga Gjilani më 16 janar 2019 janë ekspozuar në Galerinë e Artit në objektin e Parlamentit Evropian në Strasburg të Francës, me titullin “Bashkëjetesa natyrore dhe kulturore në Kosovë”, përcjell albinfo.ch.

Pas kësaj nga data 1 shkurt deri më datën 8 shkurt 2019, këto punime do të jenë prezente edhe në objektin e Ambasadës së Kosovës në Bernë (Zvicër) si dhe në shtete të tjera të Evropës dhe botës.

Ambasadorja Nazane Breca, e shoqëruar nga Mustafë Xhemaili, Ministër-Këshilltar, ka marrë pjesë në këtë ekspozitë.

“Ekspozita është një pasqyrim i vlerave shpirtërore të artistëve nga Kosova, të cilët kryesisht janë fëmijë të komuniteteve pakicë në Kosovë si serbë, boshnjakë, romë etj. Përmes pikturave dhe fotografive artistike ata kanë shprehur jetën e tyre të përbashkët, duke pasqyruar ambientin kulturor dhe natyror ku ata jetojnë”, ka thënë ambasadorja.

Këto fotografi gjithashtu janë të vendosura rreth pikturës së famshme të Ibrahim Kodrës:”Piktura për Qytetin e Ri”, një vepër e artistit tonë të madh,e cila reflekton bashkëjetesën natyrore dhe kulturore në Kosovë.