Vjosa Osmani falënderon për grantin 200-milionësh nga MCC-ja në fushën e energjisë

Presidentja Osmani shprehu mirënjohjen e saj për mbështetjen e vazhdueshme të MCC-së

Presidentja e Kosovës, Vjosa Osmani, ka pritur në takim Cameron Alford, zëvendëspresident në Korporatën e Sfidave të Mijëvjeçarit (MCC).

Në njoftimin e bërë nga Presidenca thuhet se  Osmani, në prag të fillimit zyrtar të Programit Kompakt, ka pritur sot në takim Cameron Alford, zëvendëspresident në Korporatën e Sfidave të Mijëvjeçarit (MCC).

“Në takim u diskutua për fillimin zyrtar të Programit Kompakt, me ç’rast Presidentja Osmani theksoi se granti prej mbi 200 milionë euro nga MCC-ja do ta transformojë thellësisht sektorin tonë të energjisë. Tutje, Presidentja Osmani tha se ky program do të japë kontribut strategjik në përmirësimin e infrastrukturës energjetike, fuqizimin e sektorit privat, si dhe do t’i nxisë mundësitë ekonomike për qytetarët e Kosovës”, bëhet e ditur në njoftim, transmeton albinfo.ch.

Presidentja Osmani shprehu mirënjohjen e saj për mbështetjen e vazhdueshme të MCC-së, ndërsa theksoi se Programi Kompakt është investimi më i madh në fushën e energjisë dhe shërben si dëshmi e fuqisë së partneritetit Kosovë-SHBA.

Presidentja, po ashtu, theksoi se ky program do ta garantojë një të ardhme energjetike, ku gratë do të kenë rol kyç dhe do të jenë kontribuuese aktive në adresimin e sfidave të së ardhmes në fushën e energjisë.

https://www.facebook.com/VjosaOsmaniMP/posts/975990960552110?ref=embed_post

---