Vjena, konferencë me ministrat ballkanikë për krizën e refugjatëve

Keystone

Kriza e refugjatëve që ka prekur me të madhe Austrinë, ka shtyrë këtë vend që të ndërmarrë masa më efektive për t`u ndeshur me të. Ndër to është edhe konferenca që qeveria austriake ka thirrur me ministrat e vendeve të Ballkanit Perëndimor, me temën si të ndalet fluksi i refugjatëve. Takimi po mbahet një ditë para atij të vendeve të BE-së, që do t`i kushtohet po kësaj çështjeje, shkruan dpa.de.

Me këtë rast austriakët kanë pasur parasysh vendet ballkanike si vende nëpër të cilat kalon rruga e refugjatëve që ia mësyjnë Austrisë dhe më pastaj Gjermanisë e vendeve tjera perëndimore.

“Austria dhe vendet e Ballkanit Perëndimor duhet të bashkëpunojnë më ngusht për të reduktuar sa më shumë që të jetë e mundur numrin e refugjatëve npër rrugën ballkanike”, ka thënë ministrja e brendshme Johanna Mikl-Leitner në hapje të takimit me ministrat e vendeve të përmendura që po mbahet sot, transmeton albinfo.ch.

Në takim janë ftuar ministrat e brendshëm dhe të jashtëm të nëntë vendeve, në mesin e të cilëve, të Shqipërisë, Kosovës, Maqedonisë, Serbisë, Bosnjës, Kroacisë dhe Sllovenisë.

Greqia si vend i regjionit dhe si shtet anëtar i BE-së nuk është ftuar në këtë takim, prandaj ka drejtuar kritika të ashpra në adresë të organizatorit.