Vetura që u shit për 19 milionë dollarë

Blerësi është një koleksionues makinash nga Shtetet e Bashkuara të Amerikës i cili e bëri blerjen nëpërmjet telefonit

Një Alfa Romeo 8C 2900B Touring Berlinetta u shit në ankand për vlerën e  çmendur të 19 milionë dollarëve.

Ky model është një ndër simbolet e periudhës së para luftës së dytë botërore, e vitit 1939,  dhe paraprakisht vlerësohej se do të shitej mes 16 dhe 22 milionë dollarëve. Ankandi filloi me 11.3 milionë dollarë, transmeton ‘Scan’.

Vetura cilësohet si tepër e veçantë nga koleksionuesit dhe të pasionuarit pas vetura, sidomos atyre klasike, për shkak të teknologjisë që përmban, përfshirë kompresorë të dyfishtë si dhe një motor 8-cilindërsh, i rrallë për kohën, përcjell albinfo.ch.

Vetura tashmë do t`i kalojë pronarit të saj të pestë, i cili e ka blerë për 19 milionë dollarë.

Blerësi është një koleksionues makinash nga Shtetet e Bashkuara të Amerikës i cili e bëri blerjen nëpërmjet telefonit.

Gjatë ankandit u shit edhe një Serenissima Spyder e vitit 1966 për 1.8 milionë dollarë, dy herë më shumë se vlerësimi paraprak. Ky eveniment mblodhi edhe shumë kureshtarë pasi një pjesë e madhe erdhën vetëm për të parë. Eventi mund të cilësohet padiskutim i suksesshëm pasi në total arriti të mbledhë diçka më shumë se 30 milionë dollarë.

---