Vetëvendosje kërkon lirimin e Sadri Ramabajës

Lëvizja Vetëvendosje po kërkon lirimin e aktivistit të saj, Sadri Ramabaja.

Lëvizja Vetëvendosje me anë të një njoftimi ka kërkuar që pjesëtari i saj, Sadri Ramabaja, të lirohet.

“Në një kohë kur vetë sistemi i drejtësisë po flet për krizën në të cilën ndodhet nga ndërhyrjet politike të pushtetit dhe jo vetëm, sot bëhen gjashtë muaj nga kur veprimtarit politik dhe profesorit Sadri Ramabaja i është ngritur aktakuzë dhe vazhdon të mbahet në paraburgim pa fakte e prova, por vetëm mbi supozime e trillime”, thuhet në njoftimin e LVV-së.

Sipas LVV-së, nuk ka prova për mbajtjen e Ramabajës në paraburgim.

“Pikërisht se nuk ka prova ndaj Sadri Ramabajës, paraburgimi i tij po zgjatet duke zëvendësuar dënimin. Mbajtja e Sadri Ramabajës në paraburgim duhet të marrë fund. Ai ishte asambleist i Kuvendit Komunal të Prishtinës dhe është ligjërues fakulteti. Burgimi i padrejtë e ndan nga aktiviteti, ligjëratat dhe studentët e tij”, thuhet tutje në njoftimin e VV-së.

Vetëvendosje ka thënë se duhet të ndalen arrestimet me prapavijë politike

“Nuk duhen përsëritur veprimet e regjimeve të mëhershme, por duhen mbrojtur interesat e qytetarit, e të lartësohen mundi dhe veprimtaria e gjeneratës së Ukshin Hotit”, thuhet tutje.

Po ashtu LVV ka kritikuar sistemin gjyqsor e prokurorial në Kosovë.