Vetëvendosje: Diaspora iu thotë jo marrëveshjeve

 Përgjatë muajit dhjetor, Qendrat e Lëvizjes Vetëvendosje në Diasporë, kemi mbajtur mbi 15 tubime me bashkatdhetarë. Sipas LVV-së, diaspora është kundër marrëveshjeve

Një delegacion i Lëvizjes Vetëvendosje gjatë gjithë muajit dhjetor, ka shëtitur nëpër shumë vende evropiane dhe sipas një deklarate të tyre, kanë marrë mbështetjen e bashkatdhetarëve në Gjermani, Zvicër, Austri, Belgjikë, Suedi dhe Norvegji kundër marrëveshjeve për Asociacionin e Komunave serbe dhe Demarkacionin e kufirit me Malin e Zi.

Sipas një njoftimi të kësaj partie, më të madhes në opozitën kosovare, gjatë muajit dhjetor, Qendrat e Lëvizjes Vetëvendosje në Diasporë, kemi mbajtur mbi 15 tubime me bashkatdhetarë, një protestë para Ambasadës së Republikës Kosovës në Gjermani dhe takime të shumta me anëtarë dhe simpatizues të Lëvizjes.

“Po ashtu kemi realizuar takime dhe kontakte të vazhdueshme me politikanë dhe persona të tjerë publik si gazetarë, pjesëtarë të organizatave të ndryshme të shteteve ku jetojmë, në mënyrë që t’i njoftojmë rreth gjendjes aktuale politike në Kosovë. Shumë prej tyre janë shprehur të befasuar me përndjekjet që Qeveria e Kosovës i ka bërë dhe po i bënë opozitës, e posaçërisht me arrestimin e deputetëve dhe demolimin e zyrave të subjektit më të madh opozitar”, thuhet në njoftimin e LVV-së.

Pjesëmarrja e madhe e mërgimtarëve në tubime dhe anëtarësimet e vazhdueshme në Lëvizjen Vetëvendosje nëpër të gjitha Qendrat tona në Diasporë, sipas tyre, “dëshmojnë qartë që bashkatdhetarët po bëhen më të gatshëm dita ditës për t’u bashkuar në luftën kundër regjimit shtypës, jodemokratik e të korruptuar”.

“Regjimet e pasluftës e kanë bërë Kosovën një shtet jofunksional e jodemokratik, ku të drejtat më themelore kërcënohen dhe shtypen çdo ditë. Edhe ky vit që e lamë pas na kujtoi që ende kemi shumë punë për të bërë dhe beteja për të luftuar, në mënyrë që të triumfojë e drejta për vetëvendosje për popullin e Kosovës”, thuhet në komunikatën e LVV-së.

Sipas kësaj lëvizjes, viti 2016, do të jetë vit i betejave të mëdha.

“Betejat që na presin për vitin e ri 2016 janë të shumta, ku beteja e parë gjithëkombëtare e vitit do të jetë me 9 janar. Rindërtimi dhe zhvillimi i Republikës janë të mundshme vetëm pas ndalimit të këtij regjimi autoritar tashmë 17 vjeçar. Prandaj, pjesëmarrja në protestën e 9 janarit është e domosdoshme për të gjithë ata që duan të ndërtojnë një Republikë të mirëfilltë”, konsideron kjo lëvizje, më e madhja opozitare.