Veteranët paralajmërojnë se do të bllokojnë Qeverinë dhe Kuvendin

Shkak është mospërfshirja e tyre në pagën minimale

Përjashtimi i tyre nga përfitimet me rastin e propozimit për rritjen e pagës minimale, ka detyruar veteranët e luftës së UÇK-së që sot të bllokojnë hyrjen e Kuvendit në shenjë proteste e pakënaqësie.

Nga protesta e cila nisi në orët e paradites dhe zgjati për rreth 3 orë, veterenët tentuan të futen edhe në ambientet e Kuvendit të Kosovës ku po mbshej seancë plenare. Por ata u ndaluan nga Policia. Gjatë kësaj proteste u hodh edhe gaz lotsjellës.

“Protesta u thirr për ta përcjell seancën e Kuvendit. E pamë që e ka kundërshtuar opozita. Në votim s’morën pjesë, turp për 51 deputetët që votuan, për t’i hequr veteranët nga paga minimale. Si OVL kërkojmë të rritet paga minimale për të gjithë, së paku 300-400. Me ligj, Qeveria e ka mundësi ta rrisë pensionin e veteranit”, deklaroi u.d. i kryetarit të OVL UÇK-së, Faton Klinaku.

Nga ana tjetër, Kuvendi i Kosovës nuk ka pasur kuorum për vendimmarrje në lidhje me votimin në parim të projektligjit për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore. Në votim morën pjesë vetëm 51 deputetë, gjë e cila pamundësoi miratimin e projektligjit në lexim të parë.

---