Vetëm 7.5 % të zviceranëve flasin dy gjuhë të vendit

Kompetenca gjuhësore në njërën nga gjuhët e vendit krahas gjuhës amtare, sjell një përparësi ngritje të pagës prej 14 për qind

Njëra ndër arsyet që ka Zvicra për t`u mburrur është dhe shumëgjuhësia e popullit të saj dhe kjo për shumëkë është pjesë përbërëse e identitetit nacional. Por, realiteti në terren nuk është gjithmonë kaq shembullor siç duket në parim.

Një raport i bërë nga Enti Federal i Statistikës (BFS) ka dëshmuar se popullata zvicerane është dukshëm më pak shumëgjuhëshe se sa që është menduar deri tash, shkruan srfch. Gjithnjë bëhet fjalë për njohjen dhe përdorimin e gjuhëve të tjera të vendit krahas asaj amtare.

Ky raport nxjerr në dritë të dhëna interesante sipas të cilave madje vetëm 2 në 100 zviceranë janë bilingualë, me dy gjuhë kryesore, gjermanishten dhe frengjishten, transmeton albinfo.ch. Ndërsa kur llogariten ata që dy gjuhë i flasin në punë ose në rrugë, përqindja ngrihet në 7.5%.

Por gjendja me gjermanishten dhe frengjishten është megjithatë pak më e mirë në krahasim me gjermanishten dhe italishten. Këtë kombinim dygjuhësor e kanë pasuri të tyren vetëm 1.8% e popullatës, ndërsa në jetën e përditshme, këto dy gjuhë i flasin 4 për qind.

Ndërkaq përqindja e personave që i flasin tri gjuhë të vendit është vërtet minore. Janë vetëm 0.2% të zviceranëve që flasin gjermanishten, frengjishten dhe italishten në mënyrë të barabartë, ose që nga fëmijëria, përcjell albinfo.ch. Por shkalla e atyre që këto tri gjuhë i flasinnë punë ose në jetën e përditshme është 1.8%.

Shifrat e përmendura japin një pasqyrë të zymtë për shumëgjuhësinë në Zvicër. Dhe kjo ndodh ndërkohë që njohja e më shumë se një gjuhe në këtë vend shpërblehet edhe nga ana financiare. Kështu, siç e thotë profesori i ekonomisë në Universitetin e Gjenevës, François Grin, kompetenca gjuhësore në njërën nga gjuhët e vendit krahas gjuhës amtare, sjell një përparësi ngritje të pagës prej 14 për qind.