Kritikohet vendimi i Parlamentit zviceran për deportimin e terroristëve

Një vendim i Parlamentit zviceran që kërkon dëbimin automatik të terroristëve të dënuar, edhe nëse jeta e tyre është në rrezik, ka ngjallë kritika, përcjell albinfo.ch.

Organizata për të drejtat e njeriut “Amnesty International” përshkroi vendimin e së martës se po injoron masat dhe praktikat ndërkombëtare. 

“Do të dërgojë një sinjal jashtëzakonisht negativ në bashkësinë ndërkombëtare”, thuhet në një deklaratë nga organizata.

I ashtuquajturi “parimi i mosdeportimit me forcë” obligon shtetet që të mos detyrojnë refugjatët apo azilkërkuesit të kthehen në një vend ku ka arsye serioze për të besuar se mund të përndiqen, përcjell albinfo.ch.

Gazeta “Neue Zürcher Zeitung” komenton se Parlamenti do të duhej të respektojë sundimin e ligjit.

“Forca e Parlamentit duhet të bazohet në ligj. Jo nga respekti për terroristët, por për arsye të respektit vetjak dhe parimeve tona ligjore”.

Vendimi parlamentar shkel Konventën evropiane të të drejtave të njeriut dhe Kushtetutën zvicerane, shkruan gazeta në një editorial, përcjell albinfo.ch.

“Vendimi nuk është i denjë për një vend me sundimin e ligjit. Ne jemi gati të bëhemi bashkëpunëtorë të regjimeve çnjerëzore”.

Gazeta e përditshme “Le Temps” botoi një intervistë me një zëdhënëse të zviceran të organizatës Amnesty International, Nadia Boehlen. Ajo paralajmëron se qeveria zvicerane tani përballet me një dilemë dhe me një projektligj që nuk mund të zbatohet.

Gazeta “Blick” akuzon mbështetësit e mocionit në Senat për të kapërcyer idetë populiste. “Në prag të zgjedhjeve parlamentare, senatorët vënë populizëm përpara zgjidhjeve reale”.