Vëllezërit Ajeti protagoniste në derbin zviceran, Albiani me gol, Arlindi me karton të kuq

Kundër Basel-it, GC-ja luajti me tre futbollistë shqiptarë, Meriton Kastratin, Nedim Bajramin dhe Arlind Ajetin

Derbi i madh zviceran në futboll, midis dy ekipeve me më shumë tituj, Grasshopper Zürich-ut dhe FC Basel-it, përfundoi me fitore të thellë 0:4 për mysafirët nga St. Jakob Parku, njofton albinfo.ch.

Ky derbi pritej t’i sillte përballë njëri tjetrit, vëllezërit Albian dhe Arlind Ajeti, por ky i fundit u largua herët nga loja, pas kartonit të kuq të marr në minutën e 26-të.

Nga ana tjetër Albiani u inkuadrua nga banka rezervë në minutën e 70-të dhe gjashtë minuta më vonë e shënoi golin e katërt për ekipin e Basel-it.

Basel-i mori tre pikë e plota falë tre golave të Ricky Van Wolfswinkel-it dhe golin e Albian Ajetit dhe ndjek BSC Young Boys-in në garën për vendin e parë.

Kundër Basel-it, GC-ja luajti me tre futbollistë shqiptarë, Meriton Kastratin, Nedim Bajramin dhe Arlind Ajetin. Shani Tarashaj dhe Gjelbrim Taipi nuk u aktivizuan aspak.

Taulant Xhaka zhvilloi lojë të plotë për Basel-in, kurse Albian Ajeti luajti vetëm shtatëmbëdhjetë minuta.

Në javën e 19-të të Super Ligës së Zvicërs u zhvilluan vetëm dy takime, BSC Young Boys-i fitoi 2:0 kundër XAMAX Neuchatel-it dhe Grasshopper-si humbi 0:4 nga Basel-i.

Për shkak të reshjeve të borës dhe fushave të pa përshtatshme për lojë, u anuluan ndeshjet Luzern – Sion, Lugano – Thun dhe St.Gallen – FC Zürich.

---