Universiteti ETH i Cyrihut, në vendin e tetë në botë

Botuesi i specializuar “QS Quacquarelli Symonds“, në ranglistën e tij e ka ngritur ETH nga vendi i nëntë ku ishte vitin e kaluar, në vendin e tetë. Universiteti tjetër zviceran i radhitur lart është ai EPFL i Lozanës, i cili ka zënë vendin e 14-të

Universiteti Teknik i Cyrihut ETH, i cili në të gjitha rangimet në nivel botëror del ndër më të mirët, në radhitjen më të re është ngritur edhe për një shkallë.

Në “QS World University Ranking”, të bërë nga botuesi i specializuar “QS Quacquarelli Symonds“, ETH është ngritur nga vendi i nëntë që kishte më parë në vendin e tetë, transmeton albinfo.ch mediat zvicerane e botërore. Universiteti tjetër zviceran i radhitur lart është ai EPFL i Lozanës, i cili ka zënë vendin e 14-të në këtë listë shumë prestigjioze.

Sikurse edhe në të gjitha ranglistat e bëra viteve të fundit, ETH rezulto si më i miri në mesin e universiteteve të pjesës kontinentale të Evropës, pa Britaninë e Madhe, e cila udhëheq tradicionalisht pas SHBA-së dhe disa shteteve me ndikim anglosakson.

Suksesi i universiteteve zvicerane mbështetet në internacionalitetin e tyre. Kjo shpjegohet edhe kështu: Investimet mbimesatare që ofrojnë këto institucione të arsimit të lartë dhe cilësia e lartë e jetës që ofrojnë tërheqin studiuesit më të mirë të botës.

Pas dy universiteteve teknike (ETH dhe EPFL) të Zvicrës që radhiten afër kupolës, të tjerat vijnë dukshëm më poshtë në listë, përcjell albinfo.ch. Kështu, Universiteti i Cyrihut zë vendin e 80-të, ai i Gjenevës, atë të 95, i Lozanës 138, i Bazelit, 141, i Bernës 181 dhe i St. Gallenit, 288.

Për të pestin vit me radhë vendin e parë në këtë ranglistë e zë  universiteti Massachusetts Institute of Technology (MIT). Dy të tjerat në vazhdim janë po ashtu universitete amerikane: Universiteti i Stanfordit zë vendin e dytë dhe ai i Harvardit, të tretin.