Ulje e konsumimit të mishit në Zvicër

Gjatë vitit 2016 kanë konsumuar mesatarisht nga 51 kilogramë mish, që është për gjysmë kilogrami më pak se në vitin paraprak

Konsumimi i mishit në Zvicër ka shënuar një rënie të vogël. Zviceranët gjatë vitit 2016 kanë konsumuar mesatarisht nga 51 kilogramë mish, që është për gjysmë kilogrami më pak se në vitin paraprak, bën të ditur bashkësia e prodhuesve të mishit Proviande në një njoftim për media të publikuar të hënën.

Shikuar për një kohë më të gjatë, rënia e konsumimit të mishit ndër zviceranët është më e madhe. Kështu, në vitin 2016 ata kanë konsumuar mesatarisht nga 2.5 kilogramë mish më pak se në vitin 1996, shkruan srf.ch.

Në të dhënat rreth konsumimit të mishit, Proviande nuk ka përfshirë mishin që zviceranët e blejnë me pakicë në vendet fqinje, me çmim dukshëm më të lirë.

Ndërkaq, rreth 80 për qind e mishit të konsumuar vjen nga kafshët e Zvicrës. Më së shumti është konsumuar mish derri, thuhet në njoftim.