Ulje e çmimeve të banesave në Shqipëri

@pixabay

Raporti i Stabilitetit Financiar të publikuar nga Banka e Shqipërisë tregon për një ulje të çmimeve në tregun e banesave në Shqipëri.

Sipas këtij raporti, kjo ndodh për herë të parë që nga viti 2015 dhe rënia ishte 9% gjatë pjesës së fundit të vitit të kaluar, përcjell albinfo.ch.

Raporti thotë se kjo ulje mund të jetë një fazë e normalizimit pas rritjes prej 28%, por çmimet e banesave mbeten më të lartat në histori dhe në krahasim me gjashtë vjet më parë, janë sërish gati dy herë më të shtrenjta, shkruan BIRN.

“Duhet theksuar se çmimet e vlerësuara në gjashtëmujorin e kaluar u diktuan ndjeshëm nga numri i lartë i raportimeve për shitje në zona me çmime relativisht më të larta, ndërkohë që për gjysmën e dytë të vitit shpërndarja e shitjeve sipas zonave, llojit dhe vlerës së banesave është disi më heterogjene”, shkruhet në raport, përcjell albinfo.ch.

Duke filluar nga 2018 në Shqipëri ka filluar rritja e çmimeve të patundshmërive dhe në të njëjtën kohë Banka e Shqipërisë thotë se nuk ka pasur rritje ekonomike.

Derisa çmimi i banesave është dyfishuar, ekonomia është rritur me vetëm 21% në terma nominalë mes viteve 2017 dhe 2022, shkruan BIRN.

Kështu sugjerohet se dyfishimi i çmimit të banesave përkundrejt rritjes së lehtë të ekonomisë, të mendohet se vjen nga faktorë të tjerë. BIRN shkruan se këta faktorë janë paratë e krimit apo të korrupsionit, të cilat kanë shkaktuar pabarazi, ku ekonomia e disave është forcuar aq shumë sa të shkaktojë dyfishimin e çmimeve të pronave, ndërsa ekonomia e të shumtëve nuk është rritur, përcjell albibfo.ch.