UEFA gjobit Lech Poznanin për banerin “Kosova është Serbi”

Klubi polak Lech Poznan është gjobitur nga UEFA me 10 mijë euro për shkak të shfaqjes së një baneri me përmbajtje politike gjatë ndeshjes kualifikuese të Ligës së Kampionëve kundër Cërvena Zvezdës, transmeton albinfo.ch.

Gjatë takimit të zhvilluar në fazën e tretë kualifikuese, tifozët e Lech Poznanit kishin vendosur një baner të madh me mbishkrimin “Kosova është Serbi”, gjë që përbën shkelje të rregullave të UEFA-s për mesazhet politike në stadiume.

Përveç kësaj, klubi është ndëshkuar edhe për disa shkelje të tjera të rregullave disiplinore, por gjoba për banerin ka qenë më e theksuara në vendimin e organit drejtues të futbollit evropian.

UEFA ka theksuar se do të vazhdojë të zbatojë rreptësisht rregulloret për të parandaluar përdorimin e ndeshjeve të futbollit për mesazhe politike, transmeton albinfo.ch.