U mbajt simpoziumi shkencor në rastin e ditëlindjes së Skënderbeut

Të shtunën, më 25 maj 2024, në Grampenweg 5, 8180 Bülach, Zvicër, Lidhja e Historianëve Shqiptarë me seli në Zvicër dhe Shoqata Gjergj Kastrioti, në bashkëpunim të ngushtë me Ansamblin Vatra kanë mbajtur simpoziumin shkencor me titullin: GJERGJ KASTRIOTI – SKËNDERBEU: “Mbrojtësi i Civilizimit Evropian”.

“Ky Hero Kombëtar, simbol i guximit, trimërisë dhe strategjisë së shkëlqyer ushtarake, është figura më e lavdishme e historisë shqiptare, i cili me mençurinë dhe vendosmërinë e tij mbrojti tokat arbërore dhe evropiane nga pushtimet osmane. Shoqata jonë ka për qëllim të ruajë dhe të promovojë jetën dhe veprat e këtij personaliteti të jashtëzakonshëm, duke organizuar aktivitete kulturore dhe edukative që pasqyrojnë trashëgiminë e tij të përjetshme. Me një përkushtim vetëmohues, ne punojmë për të ndriçuar rrugën e krenarisë kombëtare dhe për të forcuar identitetin shqiptar në diasporë dhe atdhe. Gjergj Kastrioti – Skënderbeu, me vizionin e tij të pamposhtur dhe zemrën e tij të madhe, mbetet burim frymëzimi për të gjithë shqiptarët dhe Shoqata jonë është krenare të mbajë emrin e tij dhe të vazhdojë misionin e tij të shenjtë”, tha kryetari Agim Pepaj.

Të pranishëm ishin edhe figura të shquara, si Qerim Kryeziu nga Suedia, Paulin Zefi nga Lezha e Kastriotit, Shqipëri, Camila Nita nga Rumania, Skender Hushi nga Italia dhe Muart Ajvazi nga Zvicra.