Transporti publik falas në Gjenevë, kjo është arsyeja

(KEYSTONE/Christian Beutler)

Transporti publik do të jetë falas në kantonin e Gjenevës të mërkurën, si pasojë e një rritjeje të ndjeshme të ndotjes së ozonit. Kjo masë, e cila zbatohet për herë të parë në Zvicër, u njoftua nga Departamenti i Territorit të Gjenevës të martën në mbrëmje, shkruan Swissinfo, transmeton albinfo.ch.

Sipas autoriteteve, vendimi është marrë pas tejkalimit të pragut të ndotjes prej 180 mikrogramë për metër kub, i regjistruar në stacionin matës të Meyrin, ku niveli i ozonit arriti afër 230 mikrogramë për metër kub.

Përveç transportit publik falas, është aktivizuar edhe sistemi i qarkullimit të diferencuar. Nga ora 06:00 deri në 22:00, në qendër të Gjenevës do të lejohen të qarkullojnë vetëm automjetet e pajisura me afishet Stick’AIR 0, 1, 2 dhe 3. Automjetet më ndotëse do të ndalohen, dhe shkelësit e këtij urdhri rrezikojnë gjobë. Kufizime janë vendosur edhe në rrugën anashkaluese të qytetit, ku shpejtësia maksimale do të jetë 80 km/orë.

Drejtoresha e Shërbimit Ajror Kantonal, Aline Staub Spörri, deklaroi se ndonëse masat nuk ndikojnë drejtpërdrejt në nivelin e ozonit, ato synojnë të reduktojnë emetimet e dioksidit të azotit me 20 deri në 25 për qind.

Qëllimi kryesor i këtyre masave është mbrojtja e shëndetit publik. Sipas ekspertëve, ekspozimi ndaj niveleve të larta të ozonit mund të shkaktojë dhimbje koke, sulme astme dhe vështirësi në frymëmarrje, veçanërisht tek fëmijët e vegjël, të moshuarit dhe personat me sëmundje të zemrës ose të frymëmarrjes.

Autoritetet kanë paralajmëruar se sistemi i kufizimeve mund të përsëritet në ditët në vijim, në varësi të zhvillimit të situatës së ndotjes, transmeton albinfo.ch.