TKK-ja thotë se po keqpërdoret vepra artistike ‘Si ta vrasim Presidentin’

Drejtuesit e Teatrit Kombëtar të Kosovës thonë se janë të shqetësimin për keqpërdorimin që i është bërë emrit të TKK-së dhe veprës artistike “Si ta vrasim Presidentin”.

Në reagim thuhet se një veprim i tillë është thellësisht i pamoralshëm dhe shpreh një mosrespekt flagrant për artin, për teatrin si koncept dhe keqpërdorim vlerës artistike e kulturore, përcjell albinfo.ch.

Teatri nuk ka të drejtë dhe nuk merret me asnjë agjendë apo përplasje politike. TKK-ja kërkon nga partitë politike të respektojnë autoritetin e teatrit.

“E ndjejmë obligim të sqarojmë se shfaqja e emërtuar në atë mënyrë siç i është ndërruar koncepti dhe qëllimi, ka si teme zhvillimet globale. Shfaqja ka të bëjë me perceptimet për Fuqitë e Mëdha botërore, siç janë Amerika, Rusia, nga vendet e vogla në zhvillim dhe në këto raste, vendet e vogla akuzojnë presidentin amerikan dhe Amerikën në përgjithësi për çfarë ndodh në ato vende. Në shfaqje flitet për Presidentin amerikan, ndikimet gjeopolitike dhe ngjarja ndodhe diku në Evropë”, theksohet në reagim.