Tina Turner bëhet zvicerane edhe “me letra”

Ajo jeton prej 20 vitesh në Zvicër dhe ndjehet e lidhur me këtë vend, ka thënë Turner dhe nga kjo lidhje ka lindur edhe dëshira e saj për tu bërë zvicerane

Ikona e muzikës rok, Tina Turner ka shumë vite që jeton në Zvicër, gjegjësisht në një vilë buzë liqenit të Cyrihut. Por vetëm këto ditë ajo ka fituar ë drejtën për të qenë e barabartë me fqinjët e saj, duke iu njohur shtetësia zvicerane.

Komuna e qytezës Küsnacht në Kantonin e Cyrihut ia ka njohur të drejtën e shtetësisë primadonës së rokut, së paku në nivelin komunal, siç bëhet e ditur në një komunikatë të lëshuar nga kjo komunë. Tashti janë në radhë kantoni dhe federata për ta thënë fjalën e tyre në mënyrë që Tina Turner edhe formalisht, në mënyrë përfundimtare të legalizojë gjendjen në të cilën praktikisht ndodhet prej vitesh, pra të bëhet shtetase e Zvicrës.

Për më tepër, Turner ka deklaruar për medie të ndryshme se me të marrë shtetësinë e re do të dorëzojë pasaportën amerikane.

Ajo jeton prej 20 vitesh në Zvicër dhe ndjehet e lidhur me këtë vend, ka thënë Turner dhe nga kjo lidhje ka lindur edhe dëshira e saj për tu bërë zvicerane edhe “me letra”.