Thirrje për prindërit shqiptarë në diasporë

Të nderuar prindër dhe bashkëkombës,

Ju ftojmë të bashkohemi me një zë të përbashkët për ruajtjen e gjuhës amtare  këtij thesari të çmuar, të trashëguar nga të parët dhe rilindësit tanë. Gjuha është ura që na lidh me atdheun, me rrënjët tona, me kulturën dhe identitetin tonë kombëtar, kudo që jetojmë.

Ne, Këshilli Koordinues i Arsimtarëve në Diasporë (KKAD), të shqetësuar, ju bëjmë me dije se shumë fëmijë rrezikojnë ta humbasin lidhjen me gjuhën e vendit të origjinës. E kemi detyrim moral dhe kombëtar t’u ofrojmë fëmijëve mësimin e gjuhës shqipe.

Ju njoftojmë se mësimi për vitin shkollor 2025/2026, në disa shtete tashmë ka filluar, ndërsa në disa të tjera pritet të nisë gjatë muajit shtator. Falënderojmë shtetet tona dhe Qendrën e Botimeve për Diasporë, e cila edhe këtë vit ka arritur të sigurojë në kohë tekstet shkollore nëpër përfaqësitë tona diplomatike.

KKAD u bën thirrje të gjithë prindërve dhe bashkëkombasve:

Regjistroni fëmijët tuaj në mësimin plotësues të gjuhës shqipe.

Mbështesni shkollën shqipe me përkushtimin tuaj.

Motivoni dhe inkurajoni fëmijët ta duan, ta mësojnë, ta ruajnë dhe ta kultivojnë gjuhën e bukur shqipe.

Bizneset dhe shoqatat të bëhen mbështetëse të shkollës shqipe.

Mediat elektronike, të shkruara dhe televizionet të ndihmojnë në sensibilizimin për rëndësinë e mësimit të shqipes në diasporë.

Të gjithë së bashku ta marrim këtë hap të rëndësishëm për të ardhmen e fëmijëve tanë dhe për mbajtjen gjallë të gjuhës dhe identitetit tonë kombëtar.

Me respekt,
Në emër të Këshillit Koordinues të Arsimtarëve në Diasporë
Kryetar, Mustafë Krasniqi