Thaçi nuk e bindë Pacollin, që të mos bëjë pengesa në miratimin e ligjeve të privatizimit

Kryeministri Hashim Thaçi, ende nuk e ka bindë Behgjet Pacollin, që të mos bëjë pengesa në miratimin e ligjeve të privatizimit që janë duke u shqyrtuar nëpër komisionet funksionale parlamentare, shkuan Koha Ditore.

Zyrtarë të lartë të Aleancës Kosova e Re kanë ripërsëritur të se nuk do ta votojnë Ligjin për Dhomën e Posaçme të Gjykatës Supreme të Kosovës, atë për Agjencinë Kosovare të Privatizimit dhe Ligjin për riorganizimin e ndërmarrjeve të caktuara, në rast se këto ligje nuk harmonizohen me konceptet e tyre për privatizim.

Deputetët e Koalicionit për Kosovë të Re i kanë përgatitur propozimamendamentet për secilin nga këto ligje dhe tash presin që ato të mbështeten edhe nga kolegët e Partisë Demokratike të Kosovës.

“Ne i kemi përgatitur amendamentet dhe, nëse ato nuk kalojnë, ne nuk do ta votojmë asnjërin nga këto ligje”, ka thënë shefja e Grupit parlamentar të Koalicionit për Kosovë të Re, Myzejene Selmani.

Ajo e ka cilësuar krejtësisht normale kundërshtimin e ligjeve në fjalë, edhe pse ato janë të sponsorizuara nga Qeveria, pjesë e së cilës është vetë KKR-ja.

Sipas saj edhe pse janë në Qeveri, nuk do të thotë që duhet të pajtohen për të gjitha gjërat me partnerin e madh të koalicionit.

Deputetët e KKR-së janë duke kërkuar që brenda Ligjit për AKP-në të futet partneriteti publiko-privat për objektet dhe pasuritë e rëndësishme, siç janë minierat, ndërmarrjet e paprivatizuara të Gjakovës, si dhe tokat e ndryshme.

Ata pretendojnë që përmes këtij modeli, pjesa publike do të arrinte ta ruante 30 përqindëshin e pronësisë, ndërkohë që investitori privat do ta merrte pjesën tjetër.

Gjithashtu deputetët e këtij kolaicioni, kanë një qasje tjetër edhe për Fondin e privatizimit, i cili prej se është krijuar nuk është shfrytëzuar asnjëherë për realizimin e ndonjë projekti për zhvillim ekonomik të vendit.

Ekspertët e ekonomisë brenda KKR-së, sipas Selmanit, kanë propozuar që mjetet që dalin nga privatizimi të derdhen në Fondin për zhvillim të qëndrueshëm ekonomik të Kosovës.