Thaçi: Caktimi i kësaj seance duhej evituar, befasi jo e mirë për mua dhe çdo shqiptar

Keystone (AP Photo/Jerry Lampen via AP Photo, Pool)

Në Dhomat e Specializuara të Kosovës në Hagë, ish-presidenti Hashim Thaçi është deklaruar para gjyqtarit se seanca e caktuar sot për 28 nëntor do të duhej evituar.

Sipas tij, është në interes që në këtë gjykatë të mos ndodhin gjëra që nuk mund të ndodhin në shtetet përkatëse të palëve.

“E mirëpres mbajtjen e kësaj seance, dhe për këtë arsye jam edhe sot në këtë seancë sepse jam i përcaktuar për respektimin e shtetit ligjor. Është me interes që në këtë gjykatë të mos ndodhin gjëra që nuk mund të ndodhin në shtete e juaja përkatëse”, u shpreh ai.

“Si çdo popull edhe ne shqiptarët kemi historinë, traditat dhe vlerat kombëtare dhe shtetërore. Mendoj që caktimi i kësaj seance sot me 28 nëntor duhej evituar. Mbajtja e kësaj seance pikërisht sot për mua dhe për çdo shqiptar është befasi jo e mire”, ka thënë ai.

Ish-presideti u shpreh se 28 Nëntori është festë e dinjitetit dhe krenarisë kombëtare.

“Sot, çdo shqiptar ka festë kombëtare, shtetërore dhe familjare sepse është festa e dinjitetit dhe krenarisë kombëtarë ku si çdo popull i lirë në botë kujton dhe feston”, tha ai teksa shtoi se sot, çdo familje shqiptare duke përfshirë edhe institucionet e Kosovës janë në festë.