Teleferikët e Zvicrës kanë shumë punë: tejkalojnë kohën e para pandemisë

Sezoni i verës ka ecur mirë deri më tani, madje edhe në krahasim me kohën para pandemisë, shkruan Seilbahnen Schweiz

Pas dy muajve të suksesshëm pranverë-verë, teleferikët zviceranë kanë pasur një frekuentim mjaft të mirë në korrik, transmeton albinfo.ch.

Krahasuar me të njëjtën periudhë të vitit të kaluar, ata deri më tani kanë pasur 50 për qind më shumë shitje. Vala e të nxehtit dhe moti me diell kanë tërhequr shumë udhëtarë ditorë në male, shkruan organizata e teleferikëve të Zvicrës, Seilbahnen Schweiz.

Fillimi i mbarë i sezonit veror ka vazhduar në korrikun e nxehtë dhe me shumë diell, shkruan srf.ch. Sezoni i verës ka ecur mirë deri më tani, madje edhe në krahasim me para pandemisë: “Në një krahasim pesëvjeçar, shifrat për Zvicrën në tërësi janë 20 për qind ose 10 për qind më të larta”, shkruan tutje Seilbahnen Schweiz.

Ndërsa sa u përket rajoneve të veçanta, trendi që është shfaqur deri më tani është konfirmuar gjithashtu: Zvicra Qendrore po përjeton ngritjen më të madhe pas fillimit veçanërisht të dobët të vitit të kaluar, transmeton albinfo.ch. Por, po ashtu edhe regjioni Oberland-i i Bernës, Valisi, Zvicra Lindore dhe Alpet Vaud si dhe Fribourg po tregojnë rezultate shumë më pozitive se në vitin e kaluar.

 

---