Një “eksperiment social”, i kushtoi me dorëheqje

Një deputet slloven u detyrua të japë dorëheqjen pasi tregoi se kishte ikur pa paguar sanduiçin, një veprim që nuk u pa aspak me sy të mirë nga shumica e qendrës së majtë, ku ai vetë është pjesë e saj.

Darij Krajçiç, 54 vjeç, e kishte përmendur këtë vjedhje të martën para kamerave në vazhdën e një debati në Parlament për mishin e infektuar polak, për të ilustruar faktin që asnjë sistem kontrolli nuk është i pagabueshëm.

Ai tregoi se ishte larguar pa paguar, pasi kishte pritur për gati tre minuta në kasë, ndërkohë që tre punonjës bënin thashetheme pa u shqetësuar aspak për të, duke e sjellë si një provë bindëse për të theksuar se kamerat e sigurisë nuk e kishin penguar aspak të kryente vjedhjen, shkruan ATSH, përcjell albinfo.ch.

Krajcic, një ekspert në fushën e pyjeve, pranoi se kishte vepruar si pedagog dhe si zyrtar i lartë. Ai kishte dashur të bëntë “një eksperiment social” dhe se ishte rikthyer në dyqan në po të njëjtën ditë për të paguar faturën.