Të gjithë pajtohen për zbritjen e sigurimit shëndetësor për të rinjtë

Fondet do të fitojnë më tepër hapësirë që të mundësojnë për të rinjtë një zbritje prej 92 frangash në muaj. Këtë zgjidhje e ka votuar sot Komisioni për Shëndetësi i Dhomës së Kantoneve

Se premitë e sigurimit shëndetësor për të rinjtë e rritur duhet të zbriten, mendon Komisioni për Shëndetësi i Dhomës së Kantoneve (SGK), shkruan srf.ch. Këtë qëndrim e kishte shprehur me një vendim të marrë edhe Dhoma Nacionale e Parlamentit të Zvicrës.

Sipas rekomandimit të SGK, fondet e sigurimit shëndetësor, për të siguruarit e moshave 19 deri 25 vjeçare duhet të paguajnë më pak në kompensimin e riskut, transmeton albinfo.ch. Përmes kësaj, fondet  do të fitojnë më tepër hapësirë që të mundësojnë për të rinjtë e moshave të përmendura një zbritje prej 92 frangash në muaj. Këtë zgjidhje e ka votuar sot Komisioni për Shëndetësi i Dhomës së Kantoneve pa asnjë votë kundër.

Shkarkimi që do të bëhet në këtë mënyrë do të bëjë të mundur që kantonet të shpenzojnë rreth 75 milionë franga më pak në vit për zbritjet e çmimeve të premive shëndetësore për të rinjtë.