Integrimi

Takimet e psikiatërve shqiptarë në Zvicër, shembull bashkëpunimi të mirëfilltë

E diel, 19 Janar 2020 - 22:35 albinfo.ch

Takimet e psikiatërve shqiptarë që jetojnë dhe punojnë në Zvicër, qofshin ato në vazhdën e kongreseve, simpoziumeve apo takimeve argëtuese zhvillohen në një frymë të pashoqe bashkëpunimi.

Në Zvicër punojnë rreth 50 psikiatër shqiptarë, prej tyre një pjesë e tyre tashmë punojnë në ordinancat e tyre private e shumë prej tjerëve bartin edhe pozita udhëheqëse në klinikat shtetërore zvicerane, shkruan albinfo.ch Takimet e tyre tashmë janë të rregullta së paku 2 herë në vit. Takimi i djeshëm, i treti më radhë që u mbajt në Basel, mblodhi mbi 30 psikiatër dhe ishte tejet mbresëlënës.

Përpos diskutimeve profesionale, psikiatrat shqiptarë kësaj radhe edhe u relaksuan nën tingujt e muzikës së mirëfilltë shqipe. Ky takim do të mbetet gjatë në kujtesë edhe për frymën artistike që u përçua dje, sidomos mbresëlënës ishte zbulimi i talentëve të këndimit, vallëzimit dhe poezisë në mesin e kolegëve të pranishëm.

Takimet deri më tani kishin më shumë karakter njohjeje, shoqërimi si dhe këmbimi përvojash profesionale në formë intervizioni, pa pikë akreditimi dhe vlerësime akademike. Mirëpo qysh në takimin e parë doli në pah nevoja e organizimit të përbashkët për t‘i dalë në ndihmë komunitetit tonë për temat dhe problemet e shumta që kanë bashkatdhetarët tanë.

Pjesëmarrësit e takimit në Basel shpresojnë që herat tjera, të jenë të pranishëm të gjithë psikiatrat shqiptarë të Zvicrës, qoftë ata që dje për arsye të ndryshme nuk patën mundësi të vijnë, qoftë ata që deri më tani ende nuk janë kyqur në grup, raporton albinfo.ch. Po ashtu të mirëseardhur janë edhe psikologët shqiptarë në Zvicër, ngase bashkëpunimi në mes të këtyre dy grupeve profesionale është më se i domosdoshëm në realizimin e projekteve profesionale në të mirë të komunitetit shqiptar në Zvicër e më gjerë.

Takimet do të shërbejnë patjetër edhe si higjienë mentale pas angazhimeve të ngjeshura profesionale dhe private.

Le të jetë ky bashkëpunim i psikiatërve shqiptarë në Zvicër, sikundër edhe bashkëpunimi kolegial në kuadër të Lidhjes së Mjekëve Shqiptarë në Zvicër, një sensibilizim për bashkimin e dijes dhe përvojave me të gjithë mjekët shqiptarë kudo në botë.