Swissalbs sjellë sërish ballon më të famshme zvicerano-shqiptare në Cyrih

Balloja më e famshme shqiptaro-zvicerane do të mbahet në shtator të këtij viti në Cyrih të Zvicrës për herën e katërt me rradhë. Swissalbs do të mirëpres qindra mysafirë, në mesin e të cilëve do të jenë edhe biznesmenët shqiptarë të cilët  janë kandidatë për të fituar çmimin për sipërmarrësin më të ri dhe më të suksesshëm për vitin 2024.

Të shtunën me 7 shtator duke filluar nga ora 18.00 në sallën e Kongreseve në Cyrih do të hapen dyert për pjesëmarrësit e ballos të organizuar nga shoqata shqiptaro-zvicerane Swissalbs, shkruan albinfo.ch. Deri në orën 19.30 të gjithë do të kenë mundësinë të argëtohen nën tingujt e muzikës së bukur shqipe nga Marisa Murtezi dhe Ilir Dërbaçi.

Pas fjalimit hyrës të moderatores së njohur zvicerane, Zoe Toresini, nga ora 21.30 do të bëhet ndarja e çmimit për “Ndërmarrësin e vitit 2024”  nga biznesmeni i famshëm Marco Gredig.

Për të krijuar momente të paharruara për pjesëmarrësit në ballo, i ftuar special do të jetë këngëtari i njohur shqiptar, Selami Kolonja i cili do të këndojë disa nga këngët më të bukura shqipe.

Deri sa performimi i Selami Kolonjës shënon fundin e ballos, Swissalbs ka menduar për pjesën e mbetur të natës. Ata kanë organizuar një “after-party”, e cila do të mbahet duke filluar nga ora 23.45 në “Park Hyatt”, ku do keni mundësinë të kërceni me muzikën e DJ Dalook dhe Freaky Boy.

Balloja e organizuar nga Swissalbs ka për qëllim të mbledhë në një vend të gjithë biznesmenët shqiptaro-zviceran të cilët me ngritjen e bizneseve të tyre kanë kontribuuar në zhvillimin e shtetit zviceran në një formë, qoftë ajo në ekonomi, arsim, kulturë e politikë. Personat të cilët mendojnë se kanë arritur të jenë të suksesshëm në ndonjë nga fushat, mund të aplikojnë për të garuar në marrjen e çmimit. Juria e caktuar nga Swissalbs përzgjedhë rrethin e ngushtë të fituesve potencial, deri sa të vendoset për top tre më favoritët, e ku më pas bëhet edhe ndarja e çmimit.