SVP: Me referendum kundër mbrojtjes gratis të azilkërkuesve

Nga pikëpamja e kryetarit të SVP-së, Toni Brunner, avokatia pa pagesë që u garantohet azilkërkuesve ndikon në zgjatjen e procedurave.

SVP/UDC përmes kryetarit të saj Toni Brunner kërkon ashpërsim të mëtejmë të politikës së azilit në Zvicër. Brunner në një intervistë që i ka dhënë gazetës “Zenralschweiz am Sonntag” ka apeluar për heqjen e mbrojtjes juridike pa pagesë, një e drejtë që azilkërkuesit e gëzojnë me ligjet në fuqi. Ai madje ka kërcënuar se nëse kjo kërkesë e partisë së tij nuk gjen përkrahje, SVP mund të iniciojë edhe referendum për këtë çështje.

Nga pikëpamja e Brunnerit, avokatia pa pagesë që u garantohet azilkërkuesve ndikon në zgjatjen e procedurave. Kështu, ky privilegj përbën padrejtësi kundrejt zviceranëve të cilët duhet të paguajnë avokatin e tyre në çdo rast.

Në projektligjin për azilin, Qeveria Federale propozon që azilkërkuesit të kenë të drejtë për përfaqësim juridik pa pagesë por në anën tjetër, t`u shkurtohet ndjeshëm afati për ankesë. Këto janë pikat bazë të reformës së azilit të propozuara nga ministrja e drejtësisë (dhe aktualisht presidentja e federatës) Simonetta Sommaruga me qëllim shpejtimin e procedurave të azilit.

Dhoma e Kantoneve tashmë e ka miratuar këtë projektligj ndërsa aktualisht me të po merret Dhoma Nacionale.