Sunrise do të shkurtojë gati 200 vende pune

(KEYSTONE/Ennio Leanza)

Grupi i telekomunikacionit Sunrise do të reduktojë fuqinë punëtore duke eliminuar deri në 190 vende pune. Lajmi u konfirmua të enjten në mbrëmje nga kompania, e cila është operatori i dytë më i madh i telekomunikacionit në Zvicër.

Sipas njoftimit zyrtar, është vendosur një plan social për pushimet nga puna të cilat konsiderohen “të pashmangshme”. Procesi i konsultimit është hapur me përfaqësuesit e punonjësve dhe me sindikatën Syndicom. Numri përfundimtar i pushimeve pritet të vendoset në shkurt ose mars.

Punonjësit e dyqaneve dhe të shërbimit ndaj klientit do të preken minimalisht nga këto masa, ashtu si edhe nxënësit praktikantë, thuhet në deklaratë.

Thjeshtim dhe ristrukturim

Këto shkurtime synojnë thjeshtimin dhe racionalizimin e strukturës organizative. Sunrise planifikon të rrisë efikasitetin përmes përdorimit të teknologjive të reja. Kompania nuk ka bërë të ditur nivelin e kursimeve financiare që pritet të arrihen nga këto masa.

Plani social përfshin, ndër të tjera, mbështetje për daljen e parakohshme në pension, si dhe ndihmë për punonjësit më të rinj për rikthim të shpejtë në tregun e punës. Gjithashtu, do të krijohet një fond për raste vështirësie ose për rikualifikim profesional.

Largimi i një drejtori të lartë

Portali online “Inside Paradeplatz” ishte i pari që raportoi për shkurtimet, duke cituar burime të brendshme. Sipas artikullit, edhe Christoph Richartz, drejtori menaxhues për çështjet e konsumatorëve, pritet të largohet si pjesë e ristrukturimit.

Një zëdhënës i Sunrise konfirmoi për agjencinë e lajmeve AWP largimin e Richartz, duke theksuar se nuk ka lidhje mes këtij largimi dhe planit për shkurtimin e vendeve të punës.

Sunrise ka më shumë se 2.600 punonjës. Në pranverën e vitit 2024, kompania kishte konfirmuar tashmë 166 pushime nga puna, pas një procesi të mëparshëm konsultimi.