Studiuesit amerikanë insistojnë në teorinë se koronavirusi doli nga laboratori

Kezstone - ThisisEngineering RAEng

Dy studiues amerikanë kanë deklaruar në një artikull të shkruar për “Wall Street Journal” se ka një provë që e bën më të besueshme teorinë që koronavirusi i ri, që shkaktoi pandeminë e Covid-19, ka dalë nga laboratori i Wuhan-it, një teori që tashmë ka zënë vend mes shumë shkencëtarëve dhe studiuesve botërorë.

Richard A. Muller, profesor në Universitetin e Kalifornisë në Berkley dhe Dr. Steven Quay, CEO i “Atossa Therapeutics”, një kompani farmaceutike që merret me zbulimin e ilaçeve për sëmundjet e reja, thonë që kjo teori po bëhet më e besueshme se ajo e daljes së koronavirusit nga një treg në qytetin kinez.

Sipas tyre, përgjigjja për origjinën e Covid-19 mund të gjendet brenda vetë virusit SARS-CoV-2. “Bazuar në përvojën e virusit SARS-1, në vitin 2003 dhe MERS në vitin 2012, dimë që shumë njerëz janë infektuar nga kafshët, shumë kohë para sesa koronavirusi të pësojë mutacion dhe të bëhet i transmetueshëm nga njeriu te njeriu”, thonë dy studiuesit në artikullin e botuar në “Wall Street Journal”.

“Një sasi e konsiderueshme të dhënash, nga fundi i vitit 2019, tregon se më shumë se 9000 persona kanë qenë të shtruar në spital me simptoma të ngjashme me ato të gripit të zakonshëm në provincat Hubei dhe Shanxi, para nisjes së epidemisë. Bazuar në përvojën e SARS-1 dhe MERS, teoria e transmetimit te kafshët parashikon se mes tyre të kishte 100 deri në 400 persona të infektuar me Covid. Ndërsa teoria e laboratorit parashikon zero raste me Covid. Nëse koronavirusi do të ishte krijuar në laborator nga shkencëtarët që po kërkonin ta fuqizonin atë, nuk do të kishte raste personash të infektuar në komunitet para se virusi të dilte nga laboratori. Hetimi i Organizatës Botërore të Shëndetësisë analizoi plot 9000 teste të ruajtura në spitalet e këtyre dy provincave dhe nuk gjeti asnjë infeksion që datonte para nisjes së epidemisë. Kjo është një dëshmi e fuqishme që mbështet teorinë e daljes së koronavirusit nga laboratori”, thonë dy studiuesit.