Studimi: Gati 90% e të diagnostikuarve me virus mund të mos kenë mjaft ngarkesë virale për të infektuar të tjerët!

(AP Photo/Jessica Hill)

Gati 90 për qind e njerëzve të testuar për COVID-19 në Massachusetts, në New York dhe Nevada gjatë muajit korrik kishin shumë pak gjurmë të virusit, dhe kjo sipas ekspertëve mund të ndodhë edhe për shkak se testet e sotme janë “tepër të ndjeshme”.

Specialistët e shëndetësisë mendojnë se testimi PCR – mënyra më e përhapur sot për të diagnostikuar COVID-19-, duhet të pësojë disa rregullime në mënyrë që të përjashtojë njerëzit të cilët kanë sasi të parëndësishme të virusit në trupat e tyre, sepse ka të ngjarë që ata të mos jenë ngjitës. Sot testi PCR, nuk thotë shumë për nivelin e virusit që njeriu ka në trup, shkruan tch, përcjell Albinfo.ch

Sot në Shtetet e Bashkuara ka gati 6 milionë raste dhe ka mbi 182,000 vdekje. SHBA-ja regjistroi të dielën një normë pozitive ditore prej 8.62 përqind, sipas të dhënave të Institutit Johns Hopkins. Organizata Botërore e Shëndetësisë ka  thënë se vendet që kanë kryer testime të gjera për COVID-19, duhet të qëndrojnë në nivelin në 5 përqind ose më të ulët se kaq për të paktën 14 ditë përpara rihapjes.