Statistikat që tregojnë kush e ka veturën më luksoze në Zvicër

(KEYSTONE/Cyril Zingaro) Foto ilustrim

Një studim i publikuar së fundmi nga kompania e sigurimeve AXA tregon dallime të mëdha në vlerën mesatare të makinave midis kantoneve të Zvicrës. Në krye të listës është kantoni i Zug-ut, ku një makinë kushton mesatarisht 67 mijë franga, rreth 35% më shumë se mesatarja kombëtare.

Pas Zug-ut renditen kantonet Schwyz dhe Appenzell Innerrhoden, ndërsa kantonet me makinat më të lira janë Neuchâtel, Jura dhe Fribourg, me çmime mesatare nga 44 deri në 45 mijë franga, transmeton albinfo.ch.

Në Zug ka jo vetëm shumë mjete të shtrenjta, por edhe makina të mëdha e të rënda  shpesh të elektrike, të cilat janë më të rënda për shkak të baterive. Një faktor tjetër ndikues është përqindja e lartë e makinave të regjistruara si automjete kompanie.

Ndërkohë, kantonet me makinat më të vjetra janë Bern, Schaffhausen dhe Appenzell Ausserrhoden, me moshë mesatare mbi 11 vjet. Në anën tjetër, makinat më të reja gjenden në Ticino, me një moshë mesatare prej 8.9 vjetësh.

Kantoni Appenzell Innerrhoden ka dalë në vend të tretë për shkak të një “efekti të veçantë”: shumë kompani të mëdha të qirasë së makinave i regjistrojnë flotat e tyre aty, duke ndikuar në statistikat e AXA.

Të dhënat janë përpiluar nga 1.2 milionë makina të siguruara nga AXA dhe përfshijnë si automjetet private, ashtu edhe ato të bizneseve. Në pesë vitet e fundit, çmimi mesatar i makinave të reja në Zvicër është rritur me rreth 14%, nga 44 mijë franga në vitin 2019 në mbi 50 mijë franga sot.